Սահակաշվիլին վրացական ընդդիմությանը կոչ է արել առաջիկա խորհրդարանական ընտրություններում միասնական թեկնածուներ առաջադրել

Վրաստանի երրորդ նախագահ Միխայիլ Սահակաշվիլին ընդդիմադիր կուսակցություններին կոչ է արել երկրի առաջիկա խորհրդարանական ընտրություններում միասնական թեկնածուներ առաջադրել, հայտնում է «Նովոստի Գրուզիա»-ն:

Այս մասին Սահակաշվիլին հայտարարել է Facebook-ի իր տեսաուղերձում:

Սահակաշվիլին միլիարդատեր Բիձինա Իվանիշվիլիի հիմնադրած «Վրացական երազանք» կուսակցությանը իշխանությունից քվեարկությամբ հեռացնելը համարում է «այլըտրանք չունեցող» ելք: Միաժամանակ, նա ասել է, որ «դժվար է նման ռեժիմների դեմ առանց ընդհանուր ջանքերի պայքարել»:

Նախկին նախագահը ողջունել է միամանդատ ընտրատարածքներում միասնական թեկնածուների շուրջ ընդդիմության շարունակական խորհրդակցությունները: Միաժամանակ, նա կոչ է արել «Վրացական երազանք»-ի ընդդիմախոսներին ուժեղացնել համախմբման եւ «թեկնածուների մեկ մեծ ցուցակ» ստեղծելու ջանքերը։ Սա նշանակում է, որ ընդդիմադիր կուսակցությունները կպայքարեն միասնական թեկնածուների հաղթանակի համար, ինչպես միամանդատ, այնպես էլ բազմամանդատ տեղամասերում:

Նա հավելել է, որ նման ցուցակում տեղերի բաշխումը իր համար մեծ նշանակություն չունի: Այնուամենայնիվ, Սահակաշվիլին առաջարկել է հերթական համարները որոշել «ըստ կուսակցությունների վարկանիշի եւ աջակցության»:

«Ես պատրաստ եմ քննարկել այս ուղղությամբ բոլոր հնարավոր առաջարկները: Հուսով եմ, որ քննարկումը կսկսվի, եւ մենք, անպայման, որոշ արդյունքների կհասնենք»,- ասել է նա:

Վրաստանում խորհրդարանական ընտրությունները նշանակված են հոկտեմբերի 31-ին: Ընտրարշավը պաշտոնապես կսկսվի օգոստոսի վերջին` ընտրություններից 60 օր առաջ: Պետք է ընտրվեն 150 պատգամավորներ՝ խառը համակարգով` ըստ կուսակցությունների ցուցակների եւ մեծամասնական միամանդատ ընտրատարածքներում։ Մոտ ժամանակներս Վրաստանի խորհրդարանը ընտրական օրենսդրության մեջ փոփոխություններ կկատարի, ինչը կմեծացնի համամասնական ընտրակարգով մանդատների թիվը եւ կնվազեցնի մեծամասնական պատգամավորների թիվը:

Ներկայում մեծամասնական ընտրատարածքներում միասնական թեկնածուների շուրջ խորհրդակցություններ են անցկացնում Սահակաշվիլիի ստեղծած «Միավորված ազգային շարժում»-ը եւ ավելի քան երկու տասնյակ ընդդիմադիր կուսակցություններ:

Ինչ վերաբերում է Միխայիլ Սահակաշվիլիին, նա այժմ ունի ուկրաինական քաղաքացիություն, վերջերս նշանակվել է Ուկրաինայի Բարեփոխումների գործադիր կոմիտեի ղեկավար: Վրացական իշխանությունները համարում են, որ առաջիկա ընտրությունների վերաբերյալ Սահակաշվիլիի հայտարարությունները միջամտություն են երկրի ներքին քաղաքականությանը: