Շուտով կնայեմ և իմ ֆեյսբուքյան էջում կտեղադրեմ. 28–ամյա թաղապետը՝ Շենգավիթում կորոնավիրուսի տարածվածության մասին

Առողջապահության նախարար Արսեն Թորոսյանը երեկ հրապարակեց կորոնավիրուսով վարակված և ինքնամեկուսացած քաղաքացիների բնակության հասցեների վերաբերյալ քարտեզը՝ 50 մետրի ճշտությամբ։ Ինչպես և սպասվում էր, ամենից շատ ինքնամեկուսացածները Երևանում էին։ Կորոնավիրուսի տարածման և դրա դեմ՝ քաղաքային պայքարի մասին NEWS.am–ը զրուցել է Երևանի ամենախիտ բնակեցված վարչական շրջաններից մեկի՝ Շենգավիթ վարչական շրջանի 28–ամյա ղեկավար Ռազմիկ Մկրտչյանի հետ։

Պարոն Մկրտչյան, Շենգավիթ վարչական շրջանում, որտեղ կորոնավիրուսի տարածման սկզբնական և ամենամեծ օջախներն էին, ինքնամեկուսացածների թիվը բավականին մեծ է։ Ըստ ձեզ՝ ինչո՞վ է պայմանավորված այս ցուցանիշը։ 

Անկեղծ ասած, դեռ չեմ հասցրել նայել, թե ինչ օջախներ կան, ֆեյսբուքում տեսել եմ, որ տարբեր տարածքներ նկարահանում կամ սքրինշոթ են անում՝ տեղադրում են, ես ինքս դեռ չեմ նայել, շուտով կնայեմ և իմ ֆեյսբուքյան էջում կտեղադրեմ, թե Շենգավիթի որ տարածքներում է ավելի շատ տարածված այդ հիվանդությունը։ Իսկ թե ինչով է պայմանավորված, չեմ կարող ասել։

Հնարավոր՞ է՝ այս վարչական շրջանում պատշաճ վերահսկողություն  չի իրականացվում։

Վարչական շրջանի ղեկավարն իրավասու չէ պարզաբանումներ տալ, թե ինչով է պայմանավորված, իսկ վերահսկողության մասով ես նման գնահատական չեմ հնչեցնում ։

Իսկ վարչական շրջանի համատիրությունները շարունակու՞մ են իրականացնել շենքերի  մուտքերի և վերելակների ախտահանում։

Այո, քաղաքապետարանի կողմից տրամադրված նյութերով և ախտահանիչ սարքերով արվում է։ Մինչև վերջերս վարակված անձանց հասցեների վերաբերյալ տեղեկություն չենք ունեցել, այսինքն վարչական շրջանն ուղիղ չի զբաղվել այդ  գործառույթով, սակայն մեր վարչական շրջանի բոլոր շենքերում, անկախ նրանից կա վարակակիր թե ոչ, մենք պարբերաբար ախտահանում ենք իրականացրել։

Դուք նույնպես միացել էիք վարչապետի՝ դիմակ կրելու ֆլեշմոբին և ձեր ֆեյսբուքյան պաշտոնական էջում կոչ էիք անում դիմակ կրել և պահպանել հակահամաճարակային կանոնները։ Ի՞նչ եք կարծում, այս իրավիճակում արդյունք կունենա՞ ձեր կոչը։

Այո, բացի այդ, ես անձամբ եմ շրջում վարչական շրջանում, ակցիա ենք իրականացնում, դիմակներ ենք բաժանում, հորդորում ենք մարդկանց, որպեսզի կրեն դիմակներ, իսկ ովքեր կրում են, շնորհակալություն ենք հայտնում։

Հետևելով ձեր ֆեյսբուքյան էջին, նկատեցի, որ ձեր կենսագրությունում նշված է՝ «պետական գործիչ». դու՞ք եք տվել ձեզ նման բնորոշում, դուք իսկապե՞ս պետական գործիչ եք։

Իմ էջու՞մ է այդպես գրված։                                           

Այո, Շենգավիթ վարչական շրջանի ղեկավար Ռազմիկ Մկրտչյանի պաշտոնական էջում ։

Անկեղծ ասած, ես պաշտոնական էջով չեմ զբաղվում։

Ընդամենը օրեր առաջ դուք այդ էջով տեսաուղերձ էիք հղում և կոչ անում քաղաքացիներին դիմակներ կրել։

Այո, ես եմ եղել, միանշանակ,  սակայն եթե ասեմ ֆեյսբուքի ավելի լավ մասնագետ եմ, չէ, սակայն չեմ բացառում, որ վրիպակ լինի, բայց այն, ինչ–որ գրված է, դա նորմալ եմ համարում, որ այդպես է գրված։