Մերկելը հայտարարել է ՌԴ-ի հետ կառուցողական երկխոսության անհրաժեշտության մասին, չնայած նրա «ապակայունացնող մեթոդներին»
ՄիջազգայինԳերմանիայի կանցլեր Անգելա Մերկելը կարծում է, որ Բեռլինը պետք է շարունակի «կառուցողական երկխոսությունը» Ռուսաստանի հետ, չնայած Մոսկվայի կողմից օգտագործվող «ապակայունացնող մեթոդներին»: Գերմանիայի կառավարության ղեկավարը դրանում վստահություն է հայտնել եվրոպական վեց թերթերի հետ հարցազրույցում, հայտնում է DW-ն:
Մերկելը ուշադրություն է հրավիրել Ռուսաստանի Դաշնության կողմից անցկացվող «ապատեղեկատվական քարոզարշավների» վրա, ինչպես նաեւ հիշեցրել է չեչենական ծագումով Վրաստանի քաղաքացի Զելիմխան Խանգոշվիլիի սպանությունը, որը անցած օգոստոսին գնդակահարվել էր Բեռլինի կենտրոնում: Այս գործով Գերմանիայի դաշնային դատախազությունը հունիսի 18-ին Ռուսաստանի կառավարությանը սպանություն պատվիրելու մեղադրանք է առաջադրել։
«Բեռլինի Տիերգարտեն զբոսայգում տեղի ունեցած սպանությունն ակնհայտորեն լուրջ դեպք է, որի համար մեղավորները ներկայում պարզվում են»,- ընդգծել է ԳԴՀ կանցլերը: «Ամեն դեպքում, մենք ընդունում ենք, որ հիբրիդային պատերազմը եւ ապակայունացման մեթոդները Ռուսաստանի կողմից վարքագծի օրինակ են»,- հավելել է նա:
Միաժամանակ, գերմանացի քաղաքական գործիչը կարծում է, որ «կան Ռուսաստանի Դաշնության հետ կառուցողական երկխոսությունը շարունակելու հիմնավոր պատճառներ»: «Այնպիսի երկրներում, ինչպիսին Սիրիան եւ Լիբիան են, որոնք անմիջապես մոտ են գտնվում Եվրոպային, Ռուսաստանի ռազմավարական ազդեցությունը մեծ է: Հետեւաբար, ես կշարունակեմ ձգտել համագործակցության»,- պարզաբանել է գերմանական կառավարության ղեկավարը:
Զելիմխան Խանգոշվիլին (Տորնիկե Քավթարաշվիլի), որը նախկինում ՌԴ կողմից հետախուզվում էր ահաբեկչության մեղադրանքով, մեկնել էր Գերմանիա այն բանից հետո, երբ 2015-ին Վրաստանում նրա հանդեպ հերթական մահափորձն էր կատարվել: Նրան գնդակահարել էին Բեռլինի Փոքր Տիրգարտեն այգում՝ 2019 թվականի օգոստոսի 23-ին: Ենթադրյալ մարդասպանը, որը Ռուսաստանի քաղաքացի է, նույն օրը կալանավորվել էր Բեռլինում:
Գերմանիայի արտգործնախարար Խայկո Մաասը եւ Անգելա Մերկելը հունիսին ավելի վաղ չեն բացառել այս կապակցությամբ Ռուսաստանի դեմ նոր պատժամիջոցներ սահմանելու հնարավորությունը:
1
2
3
4
5
1
4
5
1
3
4
5
