Ռազմիկ Գոլեցյանի անվան ազատ ոճի ըմբշամարտի հուշամրցաշարը դառնում է ավելի ներկայացուցչական

Արտաշատի Ռազմիկ Գոլեցյանի անվան օլիմպիական հերթափոխի մարզադպրոցում նոյեմբերի 14-15-ն անցկացված Ռազմիկ Գոլեցյանի անվան ազատ ոճի ըմբշամարտի 15-րդ հոբելյանական միջազգային հուշամրցաշարն ավարտվեց հետեւյալ արդյունքներով. 50 կգ ք/կ չեմպիոն դարձավ արմավիրցի Հայկ Բադալյանը, 55 կգ ք/կ` ջրվեժցի Մխիթար Գրիգորյանը, 60 կգ ք/կ` արտաշատցի Գեւորգ Թադեւոսյանը, 66 կգ ք/կ` վրաստանցի Թոռնիկե Կվինիկաձեն, 74 կգ ք/կ` վրաստանցի Տարիել Գափրինդաշվիլին, 84 կգ ք/կ` երեւանցի Սարգիս Հովսեփյանը, 96 կգ ք/կ` վրաստանցի Գիվի Մաթչատաշվինլիչն եւ 120 կգ ք/կ` վրաստանցի Զարիկո Թուրթաշվիլին: Մրցանակային տեղեր նվաճած ըմբիշները ստացան ոսկե, արծաթե եւ բրոնզե մեդալներ, նաեւ հուշանվերներ:

«Արմենպրես»-ի թղթակցի հետ զրույցում մարզադպրոցի տնօրեն Գրիգոր Սիմոնյանն անդրադառնալով արտաշատցի մարզիկներին նկատեց, որ մասնակից 12 ըմբիշներն էլ ուժեղ, մասնագիտական բարձր որակներ ունեցող մարզիկներ են, սակայն նրանք 2-3 տարով փոքր էին մասնակիցներից: «Մրցաշարի ընթացքում մեր դպրոցի սաներից աչքի ընկան հատկապես Գեղամ Գալստյանը եւ Արման Անդրեսայանը, ովքեր ազատ ոճի ըմբշամարտի ՀՀ պատանիների չեմպիոններ են: Նրանք շատ հզոր տղաների հետ մ րցեցին` զիջելով միայն չնչին միավորներով: Վստահ եմ, որ հաջորդ տարի ունենալու ենք շատ բարձր ցուցանիշներ»,-ասաց նա: Դպրոցի տնօրենն ընդգծեց, որ տարեցտարի Ռազմիկ Գոլեցյանի անվան հուշամրցաշարը դառնում է ավելի ներկայացուցչական, ինչը խոսում է ոչ միայն Հայաստանում, այլեւ Արտաշատում ազատ ոճի ըմբշամարտի զարգացման մասին: Այս տարի հուշամրցաշարին ցանկություն էին հայտնել մասնակցելու նաեւ Իրանական Իսլամական Հանրապետությունից, սակայն պայմաններից ելներով նրանց հրավեր չուղարկվեց:

Միջոցառմանը, որին մասնակցում են ՀՀ բոլոր մարզերի, ԼՂՀ-ի, ինչպես նաեւ Վրաստանի, Դաղստանի, Օսիայի թիմերը` 130 մասնակցով, ներկա էին եւ մարզիկների մրցելույթին հետեւեցին Արտաշատի քաղաքապետ Արգամ Աբրահամյանը, քաղաքապետի տեղակալ Գագիկ Պողոսյանը, ՀՀ սպորտի նախարարության օլիմպիական մարզաձեւերի վարչության պետ, մրցաշարի գլխավոր մրցավար Լյովա Վարդանյանը, ՀՀ ըմբշամարտի ֆեդերացիայի փոխնախագահ Հրանտ Ենոքյանը, ՀՀ ազգային հավաքականի գլխավոր մարզիչ Արայիկ Բաղդադյանը, ՀՀ երիտասարդական հավաքական թիմի ավագ մարզիչ Ավետիք Վարդանյանը,  ՀՀ պատանեկան հա վաքականի ավագ մարզիչ Արշակ Հայրապետյանը, աշխարհի վետերանների տասնակի չեմպիոն Ժորա Հովհաննիսյանը, աշխարհի, Եվրոպայի չեմպիոններ, Ռազմիկ Գոլեցյանի սաները, հյուրեր, այլք: Միջոցառմանը ներկա էին Գոլեցյանի այրին` Անուշ Գոլեցյանը, նրա ընտանիքի անդամները:

Տարեցտարի ավելի շատ երիտասարդներ են ընդգրկվում Արտաշատի Ռազմիկ Գոլեցյանի անվան օլիմպիական հերթափոխի մարզադպրոց: Նրա գործն այսօր շարունակում է որդին` Ռաֆիկ Գոլեցյանը եւ դպրոցի տնօրեն Գրիգոր Սիմոնյանը: Տարվա ընթացքում բազմից Ռաֆիկ Գոլեցյանի գլխավորությամբ ըմբիշները մեկնում են մրցումների, եւ վերադառնում բարձր արդյունքներով: Մարզադպրոցն այսօր ունի 252 սան, ովքեր ուսանում են ազատ ոճի ըմբշամարտ եւ բաստկետբոլ սպորտաձեւերում: Մարզիկներին մարզում են 15 մարզիչներ: Սպորտդպրոցն Արտաշատում գործում է 1993 թվականից:

Լիլիթ Մաճկալյան