Տաքսու վարորդի նկատմամբ ավազակային հարձակում կատարելու դեպքի առթիվ հարուցված քրգործն ուղարկվել է դատարան

ՀՀ քննչական կոմիտեի Երեւան քաղաքի քննչական վարչության Արաբկիր վարչական շրջանի քննչական բաժնում ավարտվել է տաքսու վարորդի նկատմամբ ավազակային հարձակում կատարելու եւ վերջինիս ավտոմեքենան վնասելու դեպքի առթիվ հարուցված քրեական գործի նախաքննությունը:

ՀՀ Քննչականկոմիտեից NEWS.am-ին հայտնում են, որ նախաքննության ընթացքում մասնավորապես պարզվել է, որ Երեւան քաղաքի 30-ամյա բնակիչը, 2020թ. մարտի 4-ին՝ ժամը 01:40-ի սահմաններում, չպարզված անձանց հետ նստել է  Վանաձորի բնակչի կողմից վարած «Օպել Զաֆիրա» մակնիշի տաքսի ավտոմեքենան եւ վարորդից վերցնելով վերջինիս պատկանող բջջային հեռախոսը՝ պահանջել է նաեւ գումար:

Մերժում ստանալով՝ 30-ամյա տղամարդը, իր հանցավոր մտադրությունն իրագործելու նպատակով, ավազակությամբ գումար հափշտակելու դիտավորությամբ, առողջության համար վտանգավոր բռնություն գործադրելով, հարձակվել է նրա վրա, բռունցքով հարվածել դեմքին ու փորձել է հարվածել նաեւ դանակով, սակայն հարվածը նրան չի դիպել, քանի որ գործով ինքնությունը չպարզված անձանցից մեկը, որը գտնվել է ավտոմեքենայում, թույլ չի տվել:

Բացի այդ, միջադեպի ընթացքում, երբ տաքսի ավտոմեքենայի վարորդը պահանջել է հետ վերադարձնել իրեն պատկանող բջջային հեռախոսը, 30-ամյա տղամարդը ոտքերով դիտավորությամբ հարվածել եւ վնասել է «Օպել Զաֆիրա» մակնիշի տաքսի ավտոմեքենայի բեռնախցիկը՝ պատճառելով զգալի չափերի գույքային վնաս:

Քրեական գործով ձեռք բերված բավարար ապացույցների հիման վրա՝ 30-ամյա տղամարդուն մեղադրանք է առաջադրվել՝ ՀՀ քրեական օրենսգրքի 175-րդ հոդվածի (ավազակություն) 2-րդ մասի 4-րդ կետով եւ 185-րդ հոդվածի (գույքը դիտավորությամբ ոչնչացնելը կամ վնասելը) 1-ին մասով: Նրա նկատմամբ որպես խափանման միջոց է ընտրվել ստորագրություն՝ չհեռանալու մասին:

Նախաքննությունն ավարտվել է, եւ քրեական գործը, մեղադրական եզրակացությամբ, ուղարկվել է դատարան: