Նաիրիտցիները սպասում են ԱԺ պատգամավորներին. նրանք ունեն երկու պահանջ

Այսօր նաիրիտցիները հավաքվել էին ՀՀ Ազգային ժողովի մուտքի մոտ: Նրանց պահանջը նույնն է ու անփոփոխ: Ամիսներ շարունակ աշխատած եւ «քոռ կոպեկ» չստացած գործարանի աշխատակիցները տրամադրված են լուրջ: Այս պահին նրանք սպասում են ընդդիմադիր պատգամավորներին, որպեսզի օրենսդիր մարմնի ներկայացուցիչների միջոցով իրենց պահանջը ներկայացնեն ՀՀ կառավարությանը:

Հանրահավաքի մասնակիցներից Զոհրակ Հովհաննիսյանը Orer.am-ի հետ զրույցի ժամանակ նշեց. «Մենք երեկ ակցիա ենք կազմակերպել նախագահականի դիմաց, իսկ այսօր այստեղ ենք: Նախագահականից մեզ ասացին, որ խնդրին ծանոթ են եւ այն կզեկուցեն նախագահին: Այսօր մենք սպասում ենք ընդդիմադիր մի քանի պատգամավորների, որոնց խնդրելու ենք խորհրդարանում բարձրաձայնել մեր խնդիրը»:
Նշենք, որ հավաքված հանրությունը խնդրի լուծման հետ կապված մեծ հույսեր է կապում պատգամավորների հետ: Աշխատավարձի մարումից բացի նաիրիտցիները պահանջում են, որպեսզի հետ վերադարձվեն նաեւ բաժնետոմսերը:

Չնայած նրան, որ նաիրիտցիները խիստ հիասթափված են գործող իշխանություններից, այնուամենայնիվ, նրանք պատրաստ են կատարած աշխատանքի դիմաց գումարը հետ վերցնելու հետո կրկին աշխատել գործարանում: Գործարանի աշխատակիցներից Էմմա Մելքոնյանը. «Այս իշխանությունները մեզ պարզապես խայտառակ են արել, ինձ զանգում են արտասահմանից ու զարմանք արտահայտելով ասում՝ ո՞նց մինչ օրս դուք չեք ստացել ձեր աշխատավարձը: Քանի այս իշխանությունները ղեկավարում են մեր երկիրը, ես որեւէ բանի չեմ հավատում, որովհետեւ գործարանը հասել է այս վիճակին նրանց ղեկավարման ժամանակ: Չնայած շատ եմ հոգնել եւ հիասթափվել, բայց, այնուամենայնիվ, եթե նորից հետ կանչեն աշխատանքի՝ ես մեծ սիրով կգնամ, քանի որ եղել եմ քլորային արտադրության ավագ ինժեներ եւ նրանց համար լավ մասնագետ»:

Հավաքվածներից Լեւոն Սարգսյանն էլ վրդովվելով ասաց. «Որքան կարելի է դիմել անօրինականությունների. մենք պայքարելու ենք մեր իրավունքների համար մինչեւ վերջ: Մենք աշխատել ենք ու պահանջում ենք մեր աշխատավարձը: Եթե հրավիրեն աշխատանքի, ապա ես անպայման գնալու եմ գործարան, քանի որ ես այն բացառիկ անձանցից եմ եղել, ով ինքնակամ է հեռացել գործարանից: Ղեկավարությունը խնդրեց, որպեսզի չհեռանամ, բայց ես նախընտրեցի լինել ժողովրդի կողքին»:

Սոսե Չանդոյան