Ես քայլելու եմ դեպի վարչապետի առանձնատուն, քանի որ ասացին, որ ինքն առանձնատանն է: Այս մասին Tert.am-ի հետ զրույցում ասաց «Կանաչ ապագա» բնապահպանական նախաձեռնության անդամ Վահագն Վարագյանը, որը իր աջակիցների հետ Սեւանի ափին է գտնվում
«Փորձելու եմ ներկայացնել Սեւանի հիմնախնդիրները, որովհետեւ պատկան մարմինների առաջացրած անորոշությունը կարող է կործանարար լինել Սեւանա լճի հիմնախնդիրների համար»,-ասաց նա:
«Սեւանա լճի խնդիրները հրատապ լուծում են պահանջում, ու թեեւ Սեւանը տարվա ընթացքում մի քանի շաբաթ է, որ կանաչում է, բայց ամբողջ տարվա ընթացքում լճում ազոտով եւ ֆոսֆորով աղտոտում է տեղի ունենում: Մենք առաջիկայում հասնելու ենք այնպիսի անդառնալի կետի, որից հետո անհնար է լինելու փրկել լիճը: Մենք կանգնած ենք լիճը կորցնելու վտանգի առջեւ»,-ասաց Վարագյանը:
Նա հավելեց, որ այս պահին վարչապետը կարող է որոշումներն կայացնել, հստակ գումարներ հատկացնել, որ Սեւան թափվող գետերի վրա մաքրման կայաններ կառուցվեն. եթե դա տեղի չունենա, մենք կորցնելու ենք Սեւանը:
«Սեւանը երկու տարի է՝ գտնվում է այս ծայրահեղ վիճակում, իսկ պատկան մարմինները որեւէ գործողություն չեն անում, որ կարողանանք փրկել Սեւանը: Ես ստիպված եմ այս ձեւով հրավիրել պատկան մարմինների ուշադրությունը Սեւանի հիմնախնդիրների վրա, որովհետեւ Սեւանն անտեսվում է, լճի մասին խոսվում է, սակայն որեւէ գործողություն տեղի չի ունենում: Հիմա ես փորձելու եմ հանդիպել վարչապետին: Փաստորեն վտանգված է նաեւ փոքրիկ Արփիի առողջությունը»,-ընդգծեց նա:
Կառավարական առանձնատան աշխատակիցներն ասացին, որ վարչապետն այնտեղ չէ: Վարագյանը նկատեց, որ այդ դեպքում ստացվում է, թե վարչապետը, հասկանալով, որ Սեւանում այս շրջանում լողալը վտանգավոր է իր ընտանիքի անդամների առողջության համար, այդտեղ չի գտնվում, մինչդեռ պատկան մարմինները քաղաքացիներին չեն իրազեկում, որ չլողան լճում:
«Վարչապետը, հասկանալով այս ժամանակահատվածում առողջության համար վտանգավորությունը՝ իր ընտանիքով այլեւս չի հաճախում, դրա փոխարեն ՀՀ հպարտ քաղաքացիները, որոնք ունեն քիչ միջոցներ, այցելում են Սեւան եւ իրենց առողջությունը վտանգի տակ են դնում»,-ասաց Վահագն Վարագյանը:
1
2
3
4
5
1
2
5
3
5
