Ու՞ր է գնում գլխավոր ճարտարապետը
ՎերլուծությունՕգոստոսի 17-ը Երևանի գլխավոր ճարտարապետ Արթուր Մեսչյանի վերջին աշխատանքային օրն էր պաշտոնում և Երևանի քաղաքապետարանում․ այս մասին իր ֆեյսբուքյան էջում հայտնել է Երևանի քաղաքապետ Հայկ Մարությանը։
Մամուլում ու սոցցանցերում սկսեցին շրջանառվել վարկածներ, թե ո՞րն էր Մեսչյանի հեռանալու պատճառը։
Հիշեցնենք, որ Արթուր Մեսչյանը գլխավոր ճարտարապետի պաշտոնը զբաղեցնելու առաջարկ ստացել էր նաև 1996թ֊ին, որն էլ ընդունել է, սակայն հրաժարական ներկայացրել 1997թ-ի փետրվար ամսին։ Մեսչյանի կենսագրության մեջ, որպես հրաժարականի պատճառ նշված է, որ գործունեության ընթացքում հանդիպել է այդ ժամանակ պաշտոնավարող քաղաքապետի կոշտ դիմադրությանը, իսկ հրաժարական ներկայացրելուց մեկնել է Բոստոն։
Հարկ է ուշադրություն դարձնել, որ Մեսչյանը կրկին պաշտոնավարեց մի քանի ամիս, իսկ այդ ընթացքում հասարակության մի շերտ, ով դիմում էր ապօրինի շինությունները օրինականացնելու կամ նոր շինթույլտվություն ստանալու համար՝ չհաջողելու դեպքում դժգոհության էր հայտնում։ Հասարակության այդ հատվածը բավականին մեծ թիվ էր կազմում, իսկ Մեսչյանի հետ «պայմանավորվել» էլ չէր լինում։ Մի պահ դժգոհությունների ալիքը նվազեց, որին հաջորդեց գլխավոր ճարտարապետի հրաժարականը։ Կար դիմադրություն թե ոչ, թողնում ենք ընթերցողին։
Այսօր էլ Երևանի քաղաքապետ Հայկ Մարությանը հայտնեց, որ այլևս Երևանի գլխավոր ճարտարապետ չի լինելու, համենայն դեպս, ինքը այդ պաշտոնը այլ կերպ է տեսնում և ներկայումս էլ քննարկում են տարբերակներ։
Նոր տարբերակը դուր չի եկե՞լ Մեսչյանին, թե՞ այս անգամ նրա հետ քաղաքակիրթ «պայմանավորվել» է ստացվել, որ հեռանա ու չշարունակի խանգարել։ Կարճ ժամանակ անց այս հարցերի պատասխանները կտան հարկի և անհարկի ավելացող շինությունները և, գուցե, կրկին Բոստոն տանող ճանապարհը….
Աննա Ավետիսյան