ԿԳՄՍ կայքում հրապարակված կենսաբանություն առարկայի չափորոշիչներում նման կետեր չկան
ՎերլուծությունԹեև ԿԳՄՍ նախարարությունը բազմիցս հայտարարել է, որ հանրակրթության պետական և առարկայական չափորոշիչներն ու ծրագրերը վերանայվում են, սակայն համացանցում ակտիվ շրջանառվում են տեղեկություններ, թե իբր 8-րդ դասարանի կենսաբանություն առարկայի չափորոշիչների օրինակելի ծրագրի նախագծով նախատեսվում է վերարտադրողական համակարգ բաժնի շրջանակներում աշակերտների ստացած գիտելիքների ստուգման ժամանակ նշել հակաբեղմնավորիչների տեսակները, դրանց գործունեությունը և նպատակները, իսկ բնագիտական և ճարտարագիտական պրակտիկաների շրջանակներում մշակել և օգտագործել մոդելները, ինչպես նաև քննարկել, թե ինչով են իրարից տարբերվում հակաբեղմնավորիչ միջոցները:
Pressmedia.am-ի կատարած լրագրողական ուսումնասիրությունները, սակայն, ցույց տվեցին, որ ԿԳՄՍ կայքում հրապարակված կենսաբանություն առարկայի չափորոշիչներում իրականում նման կետեր չկան: Ավելին, ներկայացված նախագծի համաձայն` աշակերտները ընդամենը տարրական գիտելիք կստանան վերարտադրողական համակարգի մասին, ինչը նախկին ուսումնական ծրագրում ևս եղել է, սակայն այդ մասին որևէ մեկը երբևէ չի բարձրաձայնել:
Հարց է ծագում, թե ովքեր են նման սուտ տեղեկություններ շրջանառում և ինչ նպատակով: Ու, եթե հարցը այս ոլորտում առկա խնդիրները բարձրացնելու մասին է, ապա ավելի ողջամիտ կլինի իրականությանը համապատասխանող փաստեր շրջանառել, որոնց պակասը ո՛չ համակարգում, ո՛չ էլ ոլորտում քիչ չէ: Այնպես որ արձանագրենք, որ դեղինով նշված նկարները, որոնք ակտիվ շրջանառվում են համացանցում իրականության հետ որևէ աղերս չունեն:
Դիանա Առաքելյան