Ամերիկյան «Մարիա Անտուանետան». Մելանյա Թրամփը՝ որպես առաջին տիկին

«Մելանյա Թրամփը նախագահի անսովոր կինն է: Նա գրեթե հարցազրույց չի տալիս, հասարակության առջև ելույթ է ունենում դժկամությամբ: Բայց նա զոհ չէ. ավելի շուտ նա իր ամուսնու մտերիմ հանցակիցն է, ով գիտակցաբար աջակցում է նրա ռասիզմին և կանանց հանդեպ անբարյացակամությանը», - գրել է գերմանական Focus թերթը:

Լրագրող Լիզա Ռոկարը գրել է, որ 200 տարվա մեջ առաջին անգամ առաջին տիկինը ծնվել է ԱՄՆ-ի սահմաններից դուրս և անգլերենը նրա մայրենի լեզուն չէ, այնուամենայնիվ, նա առավել տաղանդավոր է լեզուներ սովորելու հարցում, քանի որ ինչպես ասում են, նա հինգ լեզվի է տիրապետում: Բացի դրանից, Մելանյա Թրամփը միակ առաջին տիկինն է, ով նախկինում  ներքնազգեստի մոդել է եղել:

Անսովոր է ոչ միայն նրա կենսագրությունը, այլև այն, թե ինչպես է նա կատարում առաջին տիկնոջ պարտականությունները: Նա հազվադեպ է ելույթ ունենում հասարակության առջև, խուսափում է պաշտոնական հանդիպումներից և գրեթե հարցազրույց չի տալիս: Նրան հաճախ քննադատում են սուղ հասարակական աշխատանքի համար և մեղադրում այն բանում, որ նա ոչ մի դիրք չի զբաղեցնում և ժողովրդի հետ կապ չունի:

Կորոնաճգնաժամի ժամանակ Մելանյան ստացել է «Մարիա Անտուանետա» կեղծանունը, որովհետև այն ժամանակ, երբ կորոնավիրուսը կայծակնային արագությամբ տարածվում էր ԱՄՆ-ում, նա Twitter-ում հրապարակել էր լուսանկար, որում գնահատում էր թենիսի տաղավարի կառուցումը: Իսկ մինչ միլիոնավոր ամերիկացիներ կորցնում են աշխատանքը, վարակվում են Covid-ով և կորցնում հարազատներին, նա վարդերի պարտեզի նոր դիզայն է պլանավորում:

Հավանաբար, նրան ուղղված հարձակումները հանդիսանում են նրա սեփական զսպվածության հետևանք, որը քննադատությունների և ենթադրությունների տեղիք է տալիս: Մելանյայի մասին խոսելիս կարելի է ասել. «Մոդելներն այսպիսիք են՝ նրանք լուսանկարում լավ են նայվում, բայց ինչ-որ բան ասելը նրանց խնդիրը չէ»:

Այսպիսի գնահատականը, սակայն, չափազանց մակերեսային է, քանի որ Մելանյա Թրամփը միայն Դոնալդ Թրամփի «հավելվածը» չէ: Դրա մասին վկայում է նրա վարկանիշը: Ըստ հարցումներից մեկի՝ ամուսնու պաշտոնը ստանձնելուց հետո Մելանիա Թրամփը մեծացրել է իր համբավը: Նա Թրամփերի ընտանիքի ամենաճանաչված անդամն է և հանրաճանաչությամբ գերազանցում է ամուսնուն: Հարցվածների 51%-ը դրական պատկերացում ունի նրա մասին, իսկ ամուսնու մասին՝ ընդամենը 44%-ը:

Մարդկանց մի մասը գտնում է, որ Մելանյա Թրամփն ամուսնու աջակիցն է, իսկ մյուսը՝ որ նա ունի սեփական ճանապարհը: Այսպես, առաջին ուղղությունը, ուր Մելանիա Թրամփը մենակ ուղևորվել է՝ որպես առաջին տիկին, դարձել է Աֆրիկան՝ մայրցամաքը, որը նրա ամուսինը ոչ դիվանագիտորեն «կեղտոտ անցքեր» է անվանել:

Իսկ ապրիլի սկզբին, երբ ԱՄՆ-ում Covid-19-ից օրական 2 հազար մարդ էր մահանում, Մելանյան հրապարակել է իր՝ դիմակով լուսանկարը և հայրենակիցներին կոչ է արել հետևել իր օրինակին այն դեպքում, երբ իր ամուսինը հրաժարվում էր դիմակ կրել: «Թրամփի կանայք. Գործարքի մի մասը» գրքի հեղինակ Նինա Բարլեյը գործող առաջին տիկնոջ մասին գրել է. «Նա իշխանություն ունի, և ես կարծում եմ, նա դա օգտագործում է, երբ ցանկանում է»:

Focus-ը գրել է, որ Մելանյան խոստովանում է, որ գիտի իր ամուսնու բոլոր կողմերը և ընդունում է դրանք: Նրա կնամոլի մտածելակերպից, հիվանդագին ստից մինչև նրա դաժան ռասիզմը: Կան տարբեր վկայություններ այն, բանի, որ նա անգամ կիսում է:

Մելանյա Թրամփի մասին գրված դիմակազերծող գրքերը հիմնականում միավորում է այն, որ դրանք պատկերում են առաջին տիկնոջ զուսպ, պասիվ կամ անօգնական կնոջ կերպարից շատ տարբերվող այլ կերպարը: Իրականությունը, հավանաբար, գտնվում է այս ծայրահեղությունների միջև: Հնարավոր է՝ նա Մելանյա Թրամփն է, ով իր՝ առաջին տիկնոջ պարտականությունները կատարում է այնպես, ինչպես ճիշտ է գտնում: Այս ենթադրությանը հանգեցրել է Հանրապետական կուսակցության համագումարի նրա վերջին մեծ ելույթը: Երբ նրա կարևոր ելույթը ներկայացնելիս հայտարարել են, որ նրան ամբիոնի մոտ կուղեկցի ամուսինը՝ նախագահը: Եվ երբ դուռը բացվեց, նա մենակ դուրս եկավ՝ առանց նախագահի աջակցության՝ այդ պահը դարձնելով իրենը, և ոչ՝ նրանը:

Լիլիթ Բալյան

https://pressmedia.am/