Նիկոլի հրաժարականի հրամայականը
ՎերլուծությունՆախօրեին «Հայրենիք» կուսակցության նախագահ Արթուր Վանեցյանը հայտարարեց, որ բանակցողի փոփոխության դեպքում հնարավոր է հասնել ռուս-հայ-ադրբեջանական հայտնի եռակողմ համաձայնության պայմանների փոփոխության, գոնե որոշակի բարելավման: Ըստ Վանեցյանի, Նիկոլ Փաշինյանը պետք է հրաժարական տա, և պետք է ձևավորվի ազգային համաձայնության կառավարություն, որն էլ փնտրի ուղիները:
Փաստենք հետևյալը․ Հայաստանում նոյեմբերի 9-ից հետո, երբ ստորագրվեց այդ ստորացուցիչ համաձայնագիրը, ակտուալացել է Փաշինյանի հրաժարականի հարցը: Միանշանակ է, որ եթե կա ռազմական պարտություն և ռազմա-քաղաքական պարտության փաստաթուղթ, անկախ պատճառներից և բացատրություններից, ապա միանգամայն բնական է, որ կա գերագույն հրամանատարի հրաժարականի պահանջ: Ի վերջո, չպետք է մոռանալ, որ խոսքը Արցախի և Հայաստանի անվտանգային համակարգի փլուզման և Արցախի մեծ մասի կորստի մասին է: Ըստ այդմ, հանրային պահանջները միանգամայն բնական են՝ նաև արդարացված։
Կան կարծիքներ, որ պահանջ ներկայացնողների մեջ կան այս կամ այն քաղաքական կամ նույնիսկ տնտեսական, խմբային, անձնական շահեր հետապնդողներ, որոնց, մեծ հաշվով, Արցախը և Հայաստանը հետաքրքիր չեն, այլ առիթ են անձնական կամ խմբային հարցեր լուծելու համար: Սա, իհարկե, կեղծ օրակարգ է, որի միջոցով իշխանությունները փորձում են հնարավոր բոլոր տարբերակներով պահել իրենց դիրքերը։
Միաժամանակ, ներկայումս հազիվ թե որևէ ուժ իրապես ցանկանա ստանձնել կառավարումը և ըստ այդմ եռակողմ հայտարարության դրույթների իրականացումը, որը կայացվել է Ռուսաստանի հովանու ներքո: Մյուս կողմից, Փաշինյանի կառավարության պահպանումը նշանակում է այդ դրույթների կատարում՝ դրանից բխող հետևանքներով:
Ըստ այդմ, հրաժարական պահանջող ուժերը պետք է հստակ դրսևորեն կառավարում ստանձնելու և եռակողմ հայտարարության դրույթները կանխելու իրական հավակնություն ու կամք, դա հստակ ցույց տալով հանրությանը:
Անի Ավագյան