Հավերժ «կռվախնձորը»
ՎերլուծությունԻնչպես հայտնի է՝ նոյեմբերի 13-ին ռուսական պատվիրակությունը կայցելի Թուրքիա՝ քննարկելու համար Լեռնային Ղարաբաղում համատեղ դիտորդական կենտրոնի ստեղծման հարցը։
Թուրքիայի ԱԳ նախարար Մևլյութ Չավուշօղլուն այս առիթով նշել է․ «Մենք նշանակալի ենք համարում Լեռնային Ղարաբաղի վերաբերյալ Ռուսաստանի դիրքորոշումը։ Ուրբաթ Թուրքիա կժամանի Ռուսաստանից պատվիրակություն՝ քննարկելու համար Ղարաբաղում համատեղ դիտորդական կենտրոնի ստեղծման մանրամասները»։
Թուրքիայի ազգային պաշտպանության նախարար Հուլուսի Աքարն իր հերթին նշել է, որ նոյեմբերի 13-ին «ընդլայնված պատվիրակություն կժամանի Ռուսաստանից: Կքննարկվեն մարտավարական և տեխնիկական հարցեր այն մասին, թե ով որտեղ կտեղակայվի և ով ինչով կզբաղվի»,-ասել է նա:
Ըստ էության՝ եռակողմ հայտարարությունից հետո Թուրքիայի ու Ռուսաստանի պաշտոնատարները յուրօրինակ «լեզվակռվի» մեջ են։ Թուրքերը պարբերաբար խոսում են Լեռնային Ղարաբաղում ռուս-թուրքական համատեղ կենտրոնի ստեղծման և թուրք խաղաղապահների ներկայության մասին, Ռուսաստանը պարբերաբար հերքում է և նշում, որ ռուս խաղաղապահները տեղակայվելու են Ղարաբաղում, համատեղ դիտորդական կենտրոնը՝ «Ադրբեջանի բուն տարածքում», իսկ թուրք խաղաղապահներ չեն լինելու։ Ընդ որում, այս լեզվակռիվը տեղի է ունենում օրը մի քանի անգամ։
Թուրքիայի պաշտպանության նախարարը հանդիպման նախօրեին հայտարարում է, որ ոչ մի կատարված փաստ չկա, այսինքն՝ հարցը բաց է մնում, թե ով որտեղ է տեղակայվելու։ Խնդրին անդրադարձել է նաեւ Թուրքիայի նախագահի գրասենյակը, հայտարարելով, որ կենտրոնը տեղակայվելու է Ադրբեջանի գրաված տարածքում։ Ի պատասխան` Կրեմլի խոսնակն ասել է, որ դա չի համապապատասխանում իրենց ընկալումներին, եւ որ կենտրոնը պետք է տեղակայվի Ադրբեջանի բուն տարածքում։
Միանշանակ ակնհայտ է, որ Բաքուն ու Անկարան Ռուսաստանին «ներս են թողել» Շուշիի վերաբերյալ գործարքից հետո և հիմա խաղում են նրա հետ։ Թուրքերն ակնհայտորեն ցանկանում են պոկել ավելին, հնարավոր է՝ նույն այդ համատեղ կենտրոնը հենց Շուշիում կամ Ղարաբաղի մի որևէ այլ մասում տեղակայելու համար։ Առավել ևս, որ ըստ Պեսկովի՝ եռակողմ հայտարարության մեջ կենտրոնի տեղակայման վայրի մասին ոչինչ ասված չէ և դա առանձին պայմանավորվածության առարկա է։
Հետաքրքիր է, որ այս վեճում թուրքերն էլ, ռուսներն էլ Ադրբեջանից «անջատում» են Արցախը։ Ամեն դեպքում, այսօր այդ հարցը կպարզվի, որից էլ պարզ կդառնան Ղարաբաղի օկուպացիայի ռազմավարության հիմնական տարրերը, իսկ երեկ հայտարարվեց, որ ռուս խաղաղապահները մտել են Ստեփանակերտ։
Անի Ավագյան