Երկիրը կործանել է պոպուլիզմը
ՎերլուծությունՀՀ երկրորդ նախագահ Ռոբերտ Քոչարյանը հայտարարել է, որ վերադառնում է մեծ քաղաքականություն։ Ըստ նրա․ «Մարդիկ ճաշակել են պոպուլիզմի պտուղները, ճաշակել են գունավոր հեղափոխությունների, անփորձ մարդկանց աշխատանքի արդյունքները։ Եվ հիմա միանգամայն այլ կերպարների, այլ թիմերի կարիք կա»։ Այս մասին pressmedia.am կայքը զրուցել է քաղաքագետ Հրանտ Մելիք-Շահնազարյանի հետ` պարզելու համար, թե հասարակությունը ինչպես կընդունի ՀՀ երկրորդ նախագահի վերադարձը։
— Պարոն Շահնազարյան, Ռոբերտ Քոչարյանը հայտարարել է, որ վերադառնում է մեծ քաղաքականություն։ Ի՞նչ զարգացումներ կարող են լինել, ինչո՞ւ է այս փուլում նման հայտարարություն արվում։
— Հայտարարություն է արվում, որովհետև երկիրը մեծ վտանգի տակ է և ,ըստ էության, բոլոր կարող ուժերը պարտավոր են այս իրավիճակում փորձել ինչ-որ կերպ մասնակցել և ամեն ինչ անել իրավիճակը շտկելու համար։ Կարծում եմ, որ ՀՀ երկրորդ նախագահ Ռոբերտ Քոչարյանի նման հայտարարություն անելու գլխավոր շարժառիթը սա է։ Իսկ, թե ինչ արդյունքներ կարող են տալ երկրորդ նախագահի քաղաքականություն վերադառնալը, կարծում եմ, որ ժամանակը ցույց կտա։ Ամեն դեպքում, վստահ եմ, որ նա մեծ պոտենցյալ ունեցող գործիչ է և, բնականաբար, կարողանալու է որոշակի խնդիրներ լուծել։
— Նա ասում է. «Մարդիկ ճաշակել են պոպուլիզմի պտուղները, ճաշակել են գունավոր հեղափոխությունների և անփորձ մարդկանց աշխատանքի արդյունքները։ Եվ հիմա միանգամայն այլ կերպարների, այլ թիմերի կարիք կա»։ Ինչպես եք գնահատում այս հայտարարությունը։
— Կարծում եմ, որ հաշվարկված և չափազանց ակնհայտ իրողություն է և պարզ է, որ երկիրը կործանել է պոպուլիզմը, պարզ է, որ երկիրը կործանել է անփորձ գործակալական ցանկը, ըստ էության, հրապարակից։ Եվ այս իրավիճակից դուրս գալու համար միայն մեկ տարբերակ ունենք. դա պրոֆեսիոնալների ամենօրյա նվիրված, քրտնաջան աշխատանքն է։ Եվ, եթե հաջողվի կյանքի կոչել, կարծում եմ, որ նոր հուսադրող զարգացումներ կարող ենք ակնկալել։ Եթե ոչ, ապա կործանման այս ընթացքը շարունակվելու է, և ըստ էության, մենք դառնում ենք դրա ականատեսը։
— Եթե անդրադառնանք հասարակությանը, մարդիկ կընդունե՞ն Ռոբերտ Քոչարյանին։
— Դա այլ հարց է։ Ժամանակը ցույց կտա, թե որքանով Ռոբերտ Քոչարյանը ընդունելի կլինի հանրության լայն շրջանակների համար։ Բայց, կարծում եմ, որ ամեն դեպքում Հայաստանի ցանկացած քաղաքացի, անկախ նրանից թե հանրությունը ինչ վերաբերմունք և ինչ սպասելիքներ ունի նրանից, քաղաքական հայտ ներկայացնելու իրավունք ունի, և եթե վստահություն է զգում իր ուժերում՝ պետք է ամեն ինչ անի, որ դառնա այդ քաղաքական զարգացումների մասնակից։
— Արտահերթ խորհրդարանական ընտրությունների շուրջ քննարկումները շարունակվում են: Տեսակետ կա, որ պայքարը հիմնականում լինելու է Փաշինյանի և Քոչարյանի միջև: Ինչպե՞ս եք գնահատում ստեղծված իրավիճակը:
— Ստեղծված իրավիճակը բավական լարված է, դա միանշանակ կարող ենք ասել, բայց թե ում միջև կընթանա հիմնական պայքարը, նույնպես կարծում եմ, որ ժամանակը ցույց կտ, դեռևս վաղ է խոսել այդ մասին։ Դա կլինի Ռոբերտ Քոչարյանը, թե քաղաքական այլ ուժի ներկայացուցիչ, որը կարող է ևս հայտ ներկայացնել, կտեսնենք։
Սոնա Ավագյան