Մարուքյանը կխառնի՞ Փաշինյանի պլանները
ՎերլուծությունԸնտրական օրենսգրքում իշխանության նախաձեռնած փոփոխությունները կարող են դառնալ Նիկոլ Փաշինյանի և Էդմոն Մարուքյանի միջև ձեռք բերված պայմանավորվածության չեղարկման պատճառ։
Խնդիրն այն է, որ «Լուսավոր Հայաստանը» կարծում է, որ եթե «Իմ քայլը» առանց ընդդիմադիր ուժերի մասնակցության գնում է Ընտրական օրենսգրքի փոփոխության, նշանակում է՝ խախտում է ձեռք բերված պայմանավորվածությունը։ Դա, ըստ էության, այդպես է։ Ստացվում է այնպես, որ Նիկոլ Փաշինյանը բանակցում է խորհրդարանական ընդդիմադիր ուժերի հետ` թեկնածու չառաջադրելու հարցի հետ կապված, սակայն մնացած բոլոր հարցերում նրանց տեսակետներն ու մոտեցումները հաշվի չի առնում։ Ու եթե ամենաառանցքային՝ Ընտրական օրենսգրքի շուրջ կոնսենսուսի հարցում Փաշինյանը հաշվի չի նստում ընդդիմության հետ, և օրենսգիրքը փոխում է իր քաղաքական նախասիրությունների շրջանակում, ապա ինչո՞ւ պետք է ԼՀԿ-ն դուրս չգա պայմանավորվածությունների շրջանակից։ Դասական քաղաքականությունը դա է պահանջում։
Ի դեպ, այսպես կոչված ռեյտինգային ընտրակարգը հանելու կամ չհանելու հարցի հետ կապված «Իմ քայլում» միասնական մոտեցում չկա, հավանաբար սպասում են Փաշինյանի վերջնական որոշմանը։ Եթե, այդուհանդերձ, Նիկոլ Փաշինյանը միանձնյա որոշի գնալ Ընտրական օրենսգրքի հապճեպ փոփոխությունների, ինչը լրջագույն ռիսկեր է պարունակում, ապա Մարուքյանը, ըստ երևույթին, կչեղարկի պայմանավորվածությունները ու Փաշինյանի հրաժարական տալու պարագայում կարող է առաջադրվել որպես վարչապետի թեկնածու։ Առաջին հայացքից թվում է, որ Մարուքյանի առաջադրումը ոչինչ չի փոխի, քանի որ «Իմ քայլը» բացարձակ մեծամասնություն ունի ԱԺ-ում։ Բայց չի բացառվում, որ հենց «Իմ քայլից» գտնվեն բազմաթիվ պատգամավորներ, որոնք Էդմոն Մարուքյանին համարեն փոխընդունելի թեկնածու և քվեարկեն նրա օգտին։ Եթե Փաշինյանը մի կաթիլ անգամ վստահ լիներ, որ իր խմբակցությունը ցանկացած այլ թեկնածուի կողմ չի քվեարկի, ապա նա դռնեդուռ ընկած չէր համոզի խորհրդարանական ընդդիմությանը իր հրաժարականի դեպքում թեկնածու չառաջադել։ Նման սցենարը Փաշինյանը նույնպես իրատեսական է համարում և զգուշանում է կտրուկ, առանց երաշխիքի քայլեր անելուց։
Անի Առաքելյան