Հայաստանը պետք է բազմակողմանի համագործակցություն ապահովի տարբեր գործընկերների հետ
ՎերլուծությունՎարչապետի պաշտոնակատար Նիկոլ Փաշինյանն Ազգային ժողովի ամբիոնից հայտարարեց, որ Սյունիքի մարզում հիմնադրվել է ռուսական 102-րդ ռազմաբազայի երկու նոր հենակետ։ Այս թեմայով զրուցել ենք քաղաքագետ Ռոբերտ Ղևոնդյանի հետ։
Հարցին, թե արդյո՞ք այս պահին անհրաժեշտ էր նոր հենակետ ստեղծել՝ քաղաքագետը պատասխանել է․«Իմ կարծիքով իշխանությունները այդ որոշումը հեշտ չեն ընդունել, այնուամենայնիվ, իրենք ավելի տեղեկացված են մեր ռազմական ներուժի մասին, քան մենք, և, հավանաբար, այդ ռազմական հենակետերի առկայությունն անհրաժեշտություն է եղել Հայաստանի անվտանգությունն ապահովելու համար։ Այստեղ այլ հարց է, թե այդ անվտանգության ապահովման համար բոլոր հույսերը Ռուսաստանի հետ կապելը որքանո՞վ է համապատասխանում Հայաստանի շահերին։ Ըստ ամենայնի, Հայաստանի զինված ուժերը ի վիճակի չեն ինքնուրույն ապահովելու այն անվտանգությունը, որը պահանջվում է Սյունիքում։ Հետագա զարգացումները ցույց կտան, թե որքանով էին դրանք համապատասխանում մեր շահերին»։
Հարցին թե ինչ օգուտներ կարող է ունենալ Հայաստանը այդ ռազմաբազայից Ռոբերտ Ղևոնդյանը պատասխանել է, որ Հայաստանի հիմնական շահը անվտանգության ապահովումն ու բարձրացումն է․ «Հայաստանի առաջնային շահը անվտանգության մակարդակի բարձրացումն է, հաշվի առնելով այն, որ թշնամին խոսում է Մեղրիում ուժով միջանցք ստեղծելու մասին, և նրան մեղմ ձևով ձայնակցում է Թուրքիան՝ Հայաստանին հրավիրելով տարբեր հարթակներ: Հայաստանը ոչ մի դեպքում չպետք է հրաժարվի երկխոսելուց, բայց ստիպված է իր շահերը տարածաշրջանում հարմարեցնել այն երկրի շահերին, որոնք դրա դիմաց որևէ բան են խոստանում, ինչպես Ռուսաստանը։ Մեր խնդիրներից է այն, որ չենք կարողանում դիվերսիֆիկացնել մեր արտաքին անվտանգության մակարդակն ու անընդհատ, նորանոր դեպքերից ելնելով, այդ անվտանգությունը կապում ենք միայն Ռուսաստանի հետ: Իմ կարծիքով ճիշտ կլիներ, եթե Հայաստանը կարողանար բազմակողմանի համագործակցություն ապահովել տարբեր գործընկերների հետ, ինչը հնարավորություն կտար ավելի ճկուն լինել և մեր շահերն ավելի լավ իրացնել նման իրավիճակներում»։
Անի Սարդարյան
Pressmedia.am