Գործում է տուգանքների լողացող գնացուցակ
Ուշադրության կենտրոնումՀոկտեմբերի 14-ից, առողջապահության նախարարի հրամանով, աշխատողների հանդեպ կիրառվում է ՊՇՌ հետազոտության բացասական արդյունքը հավաստող սերտիֆիկատ ներկայացնելու պահանջը։ Ըստ հրամանի, աշխատողը պարտավոր է յուրաքանչյուր 14 օրը մեկ ներկայացնել իր հաշվին կատարված կորոնավիրուսային հիվանդության ախտորոշման ՊՇՌ հետազոտության բացասական արդյունքը հավաստող սերտիֆիկատ (առավելագույնը 72 ժամ վաղեմության), բացառությամբ ամբողջական պատվաստված, մեկ դեղաչափ պատվաստված, փաստագրված բացարձակ հակացուցում ունեցող աշխատողների եւ հղիների։
Այս ընթացքում թե՛ մայրաքաղաքում, թե՛ մարզերում քաղաքապետարանն ու մարզպետարանները հարցումներ են ուղղում հանրակրթական հաստատություններին՝ պարզելու, թե կոլեկտիվից քանիսն է պատվաստված, քանիսը՝ թեստավորված, քանիսն ունի առողջական հակացուցումներ, եւ այդ բոլոր տվյալները լրացվում են մատյաններում, ընդ որում՝ առանձին-առանձին. պատվաստվածները մի մատյանում են, թեստավորվածները` մեկ այլ, իսկ հակացուցվածները՝ ուրիշ: Կա նաեւ ջերմաչափումների մատյան, այստեղ նույնպես աշակերտների եւ ուսուցիչների մատյանները տարբեր են:
Թե՛ պետական, թե՛ մասնավոր սեկտորում վերահսկողությունն իրականացնում է Առողջապահական եւ աշխատանքի տեսչական մարմինը: Աշխատողի չպատվաստվելու կամ ՊՇՌ թեստ չներկայացնելու դեպքում պատասխանատվությունը, դիցուք՝ հանրակրթության ոլորտում, կրում են ուսումնական հաստատությունների տնօրենները։ Բայց խնդիրն այն է, որ հստակ չէ ո՛չ տուգանքի չափը, ո՛չ էլ խախտման ծավալը: Հստակեցված չէ նաեւ տուգանքի չափը դիմակներ չկրելու հարցում: Մի դպրոցում դա կարող է սահմանափակվել նախազգուշացումով, մեկ այլ դպրոցում ուսուցիչը հնարավոր է տուգանվի 30 հազար դրամով` դիմակ չկրելու համար:
Ի դեպ, աշակերտի` դիմակ չկրելու համար տուգանվում է տնօրենը։ Այս պարագայում եւս տուգանքները տարբեր են, եւ ֆիքսված թիվ չկա: Այս լողացող գնացուցակը, ըստ էության, լիազոր մարմնի ներկայացուցիչներին հնարավորություն է տալիս, հարկ եղած դեպքում աչք փակել որոշ խախտումների վրա, իսկ որոշ դեպքերում էլ կիրառել տույժ ու տուգանքներ՝ ըստ իրենց հայեցողության։
Ի դեպ, նախօրեին Առողջապահական եւ աշխատանքի տեսչական մարմնից եւս մեր հարցին ի պատասխան նշել էին, թե տուգանքները սահմանվում են՝ կախված խախտման ծավալից ու բնույթից, եւ ամեն ինչ որոշվում է՝ պայմանավորված տվյալ կազմակերպությունում առկա իրավիճակով ու հայտնաբերված խախտումներով։