Արցախի պետնախարարն աշխատում է բոլոր ուղղություններով, հունից հանում դժգոհներին

«Արցախի և արցախցիների՝ իրենց հողի վրա արժանապատիվ ապրելու իրավունքի պայքարը ոչ միայն հայերի, այլև աշխարհի համար է կարևոր, քանի որ այն արժանապատվությունը, արժեքները պահպանելու պայքար է»,- երեկ «Արցախ, 44- օրյա շրջափակում» խորագրով Արցախի բարեկամների հետ հեռավար հավաքի ժամանակ հայտարարել է Արցախի պետնախարար Ռուբեն Վարդանյանը, նա շեշտել է, որ չնայած ծանր վիճակում են, բայց լավատես են, քանի որ տեսնում է արցախցիների ոգին և կամքի ուժը։

Պետնախարարն ընդգծել է՝ պատրաստ են ամեն ինչով անցնելու, որովհետև արժանապատիվ ապրելու ձգտումը և սերը դեպի հայրենիքը մեծ որժ է տալիս։ Ռուբեն Վարդանյանի գործունեությունը Արցախում չի սահմանափակվում միայն բացառապես տեխնիկական և կառավարչական գործունեությամբ, շրջափակման հետևանքները մեղմելով։

Պետնախարարը նաև աշխատում է գրեթե բոլոր ուղղություններով թե՛ Արցախում ներքաղաքական կյանքը կարգավորելու, թե՛ բացասական երևույթները զսպելու և բյուջեի վրա աչք ունեցողներին պատժելու կամ հեռացնելու, այլև միջազգային մամուլի տարբեր միջոցների հետ շփումներով, աշխարհում Հայաստանի և Արցախի նկատմամբ դրական տրամադրված և ազդեցություն ունեցող մարդկանց իրար գլուխ հավաքելով և նրանց հնարավորությունների լծակներն օգտագործելով։

Թերևս հենց այդ հանգամանքն է պատճառը, որ թե՛ Հայաստանի գործող իշխանությունները և թե՛ Ադրբեջանի իշխանություններն ամեն ինչ անում են Ռուբեն Վարդանյանից ազատվելու համար։

Ըստ էության, այս կեղտոտ արշավում որոշակիորեն մասնակցում են նաև Արցախի իշխանական և քաղաքական դաշտի տարբեր ներկայացուցիչներ, որոնց մի մասը չի կարողանում սեփական դեմքով արտահայտել իր դժգոհությունը և փորձում են զարտուղի ճանապարհներով ու կեղտոտ միջոցներով սասանել Ռուբեն Վարդանյանի՝ օրեցօր ավելացող վարկանիշը։

Մյուս կողմից էլ Արցախի նախագահ Արայիկ Հարությունյանի հետ սերտ առնչություն ունեցող անձինք են արշավ սկսել՝ փորձելով հայ հանրության շրջանում բացասական տրամադրություններ սերմանել պետնախարարի հանդեպ, ինչն իհարկե, անլուրջ և անհեռանկարային գործ է։

Սերինե Բադալյան