Ռուբեն Վարդանյանի ակտիվությունը վկայում է նրա ազդեցության բավականին բուռն աճի մասին
Վերլուծություն«Ադրբեջանի կողմից իր պայմանավորվածությունների հերթական խախտումը էլ ավելի է սրել իրավիճակը Արցախի շուրջ». այս արձանագրությունը իր ֆեյսբուքյան էջում արել է նախկին պետնախարար Ռուբեն Վարդանյանը։
Վերջին օրերին Ռուբեն Վարդանյանը չափազանց ակտիվ հանդիպումների մեջ է, աշխատանքային հանդիպումներ է ունեցել, գործողությունների ծրագիր քննարկել և որոշակիացրել ստեղծված իրավիճակից դուրս գալու կոնկրետ քայլերը։
Ըստ Վարդանյանի՝ Արցախի երիտասարդության նախաձեռնող խումբը իր կողմից ձևակերպել և հաստատել է գործողությունների ծրագիր, որը պետք է իրականացվի, եթե Ադրբեջանը պատրաստ չլինի վերադառնալ եռակողմ հայտարարության տառի ու հոգու պահպանմանը։ Նախկին պետնախարարը աշխատանքային հանդիպումներ է անցկացրել Արցախի քաղաքական կուսակցությունների հետ, մշակվել է միասնական դիրքորոշում, իրադարձությունների ցանկացած զարգացման պարագայում Արցախի ժողովրդի շահերին միանշանակ պաշտպանությանն ուղղված քայլերի առնչությամբ։
Վարդանյանը քննարկումներ է ունեցել նաև Արցախի նախագահի և անվտանգության խորհրդի ղեկավարության հետ։ Ռուսական խաղաղապահ զորախմբի հրամանատարությանն էլ տեղեկացվել է Արցախի ժողովրդի և քաղաքական ուժերի դիրքորոշման մասին, նշվել, որ արցախցիները նրանց կողմից միջանցքի ապշրջափակմանն ուղղված կոնկրետ քայլեր են սպասում, քանի որ այսպիսի պայմաններում միջանցքը Արցախի կողմից չի օգտագործվելու։
Ռուբեն Վարդանյանի այս ակտիվությունը, երբ լրջագույն մասնակցություն է Արցախի ներքաղաքական իրողություններին և կոնկրետ ծրագրերի մշակմանը, վկայում են նրա ազդեցության բավականին բուռն աճի մասին, թեպետ Արայիկ Հարությունյանը նոր պետնախարար է նշանակել, սակայն վերջինս միայն ֆեյսբուքյան ստատուսներով է աչքի ընկել, իսկ Արցախի հանրությունն ու քաղաքական ուժերը կրկին իրենց հայացքներն ուղղղել են նախկին պետնախարարի ուղղությամբ, թերևս գիտակցելով, որ նրա դեմ իրականացված արշավը որևէ լավ տեղ չտարավ և ընդհակառակը, ավելի սրեց իրավիճակը։
Ուստի այժմ ժամանակն է մի կողմ դնելու բոլոր հակասությունները, միավորվելու կոնկրետ հնարավորություններ և կապեր ունեցող մարդկանց շուրջ և Արցախը օրհասական իրավիճակից դուրս բերել։
Նոնա Մուսայելյան