Հայաստանի թիմի հանդեպ լարվածություն կար. Արթուր Ալեքսանյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին


Հայաստանի օլիմպիական պատվիրակությանը դափնիներով և երգ-երաժշտությամբ են դիմավորել «Զվարթնոց» օդանավակայանում:

Փարիզի 33-րդ ամառային Օլիմպիական խաղերում արծաթե մեդալակիր դարձած հունահռոմեական ոճի ըմբիշ Արթուր Ալեքսանյանը (97 կգ) լրագրողների հետ զրույցում խոսել է եզրափակիչ գոտեմարտի արդյունքը բողոքարկելու մասին:

Աարավին մեղավոր չէր, մրցավարի մեղքն էր: Իրանցի ըմբիշի հետ ոչ մի խնդիր չկա:

Հայաստանի թիմի հանդեպ լարվածություն կար, մեր չելենջներից ոչ մեկը դրական պատասխան չի ստացել: Նույն Սլավիկ Գալստյանի համար կարող եմ ասել, որ կիսաեզրափակչում հաղթեց, բայց մրցակիցը բողոքարկեց և գոտեմարտի ելքը փոխվեց: Սլավիկը պետք է հանդես գար եզրափակչում»,- ասել է 2016թ. օլիմպիական չեմպիոնը:

Աշխարհի քառակի և Եվրոպայի 7-ակի չեմպիոն Արթուր Ալեքսանյանի հայրը և անձնական մարզիչը` Գևորգ Ալեքսանյանը, ևս խոսել է որդու գոտեմարտի վերաբերյալ բողոքարկում ներկայացնելու մասին:

«Եթե մենք այս գործընթացում միայնակ չմնանք, իմաստ կունենա բողոքարկումը: Եթե արդարությունը չվերականգնվեց, գնալու ենք հաջորդ քայլերին, մարզական իրավաբան ենք գտնելու»:

ԿԳՄՍ փոխնախարար Կարեն Գիլոյանն էլ լրագրողներին տեղեկացրել է, որ կարող են դիմել Լոզանի մարզական արբիտրաժային դատարան:«Հույս ունեմ, որ Միջազգաային օլիմպիական կոմիտեի բողոքարկման հանձնաժողովը դրական որոշում կկայացնի: Եթե այդ կառույցը որոշում չկայացնի, կդիմենք Լոզանի դատարան: Լիահույս ենք, որ ոսկին գալու է Հայաստան»,-նշել է նա:

Ավելի վաղ Գիլոյանը տեղեկացրել էր, որ Ըմբշամարտի համաշխարհային ֆեդերացիան (UWW) գրավոր նամակով պատասխանել է Հայաստանի ըմբշամարտի ֆեդերացիայի բողոքարկմանը և նշել, որ մրցավարները ճիշտ են դատել Արթուր Ալեքսանյանի մասնակցությամբ եզրափակիչ գոտեմարտը:

Իր համար առաջին Օլիմպիական խաղերում բրոնզե մեդալ նվաճած, հունահռոմեական ոճի ըմբշամարտի աշխարհի չեմպիոն և Եվրոպայի առաջնությունների եռակի ոսկե մեդալակիր Մալխաս Ամոյանը (77 կգ) ևս լրագրողների հետ զրույցում ամփոփեց Փարիզ-2024-ը: