Նախագահականի մեքենաները կրկնակի կկրճատվեն․ կառավարությունից որոշում են ստացել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ծառայողական մեքենաների վրա խազեր քաշելով ավտոպարկը կրճատող Նիկոլ Փաշինյանը օրերս մեքենաների կրճատման վերաբերյալ հանձնարարական է ուղարկել նաև ՀՀ նախագահի աշխատակազմ։ Կրճատման վերաբերյալ կառավարության որոշման մասին MediaHub-ին հայտնեց նախագահականի աշխատակազմի ղեկավարի տեղակալ Խաչատուր Պողոսյանը, որն այս պահին կատարում է աշխատակազմի ղեկավարի պարտականությունները։

Հիշեցնենք, մենք գրել էինք, որ Նիկոլ Փաշինյանը մեքենաների կրճատման վերաբերյալ հանձնարարական է ուղարկել մի շարք գերատեսչությունների, այդ թվում՝ Ազգային ժողովի աշխատակազմին, որով պահանջել է կրճատել ԱԺ աշխատակազմի ղեկավարին, հանձնաժողովների նախագահներին, խմբակցությունների ղեկավարներին, նաև ԱԺ նախագահի ընտանիքին սպասարկող ծառայողական մեքենաները։ Այս ամենից, փաստորեն, զերծ չի մնացել նաև նախագահի աշխատակազմը։ 

Խաչատուր Պողոսյանը մեզ ասաց, որ 2018 թվականից ի վեր՝ նախագահականի ավտոպարկը կրճատումների ենթարկվել է և դեռ էլի պիտի ենթարկվեր, բայց այս որոշմամբ էլ ավելի է կրճատվելու իրենց մեքենաների թիվը։ Մասնավորապես, ըստ Պողոսյանի՝ 2018-ին ՀՀ նախագահի աշխատակազմում կար 22 ավտոմեքենա, այս տարիներին դրանց թիվը 4-ով կրճատվել է՝ դառնալով 18 մեքենա, իսկ այս տարվա հուլիսի 18-ին կառավարության կայացրած որոշմամբ այդ թիվը ևս 6-ով պետք է կրճատվեր՝ դառնալով 12 ավտոմեքենա։ Այդ որոշման իմպլեմենտացիայի, այսինքն՝ թվաքանակի կրճատման գործընթացն իրականացնելու համար սահմանվել էր վեց ամիս ժամանակաշրջան, որը լրանում է հունվարի 1-ին։ 

«Հիմա առաջարկություն կա դիտարկել՝ այդ 12-ից էլ կրճատել մեքենաների թվաքանակը, հիմա մենք քննարկում ենք, թե ինչպես է դրա իմպլեմենտացիան իրականացվելու»,- ասաց Պողոսյանը։ 

Նա ասաց, որ կառավարությունից իրենց ուղարկված առաջարկության մեջ նշված է, որ ցանկալի է ավտոպարկում թողնել ընդհանուր հինգից յոթ մեքենա, բայց իրենք հակված են թողնելու հինգ մեքենա ընդամենը, և կրճատելու են տարեթվով ավելի հին մեքենաները։ Աշխատակազմի ղեկավարին, այս դեպքում՝ իրեն սպասարկող 2013 թվականի արտադրության Kia Cerato մակնիշի ավտոմեքենան կմնա, ևս մի քանի մեքենա կթողնեն, մյուսները կկրճատեն։ 

«Մեր մեքենաները պաշտոնյաներին սպասարկող մեքենաներ չեն, մեր մեքենաները մարմնին սպասարկող մեքենաներ են, դրանք, ըստ էության, հերթապահ կարգավիճակով են, ում անհրաժեշտ է լինում, հայտը ներկայացնում է, և այդ ծառայությունն արվում է»,- ասաց Խաչատուր Պողոսյանը։ 

Փաստորեն, կառավարության որոշմամբ նախագահականի՝ 2025 թվականի հունվարից կրճատվող ավտոպարկը էլ ավելի է կրճատվելու, և հիմա նախագահականի աշխատակազմը զբաղված է այդ մեքենաները Պետգույքի կառավարման կոմիտեին հանձնելու գործընթացով, որ Կոմիտեն էլ իր հերթին կազմակերպի այդ շարժական գույքի օտարումը աճուրդով։ 

Վահե Մակարյան