«Դասական Եվրատեսիլ 2026»-ի բրենդինգի ոգեշնչման աղբյուրը Մինաս Ավետիսյանի «Ջաջուռ» կտավն է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանի հանրային հեռուստաընկերության և Եվրոպական հեռարձակողների միության համագործակցության շրջանակում այս տարի «Դասական Եվրատեսիլ 2026» միջազգային մրցույթն առաջին անգամ անցկացվելու է Հայաստանում: Հունիսի 6-ին եվրոպական 10 երկրների պատվիրակություններ ժամանելու են Հայաստան և Ալեքսանդր Սպենդիարյանի անվան օպերայի և բալետի ազգային ակադեմիական թատրոնի մեծ բեմում փայլելու են իրենց տաղանդով: Մասնակից երկրներն են Հայաստանը, Բելգիան, Կիպրոսը, Չեխիան, Գերմանիան, Լատվիան, Լեհաստանը, Պորտուգալիան, Սերբիան, Շվեդիան և Շվեյցարիան:

Հայաստանի հանրային հեռուստաընկերությունը և Եվրոպական հեռարձակողների միությունը ներկայացնում են առաջին անգամ Հայաստանում անցկացվելիք «Դասական Եվրատեսիլ 2026»-ի պաշտոնական բրենդինգը, որի հիմքում հայկական մշակույթն ու արվեստն են։

Բրենդինգի ոգեշնչման հիմնական աղբյուրը Մինաս Ավետիսյանի «Ջաջուռ» կտավն է։ Այս ստեղծագործությունից վերցված գունային լուծումները դարձել են ողջ պատկերավորման հիմքը։ Մինասի ինքնատիպ և արտահայտիչ գույները հստակ պատկերում են նաև Հայաստանի Հանրապետության եռագույնը՝ ստեղծելով ամբողջական տեսողական պատկեր, որը ներկայացնում է Հայաստանի հարուստ մշակութային ժառանգությունն ու ազգային ինքնությունը։

Հունիսի 6-ի ընտրությունը ևս խորհրդանշական է, քանի որ այդ օրը հայ մեծ կոմպոզիտոր Արամ Խաչատրյանի ծննդյան օրն է։ Բրենդինգում օգտագործված նոտաները վերցված են նրա աշխարհահռչակ «Դիմակահանդես» ստեղծագործությունից՝ ընդգծելով հայկական դասական երաժշտության կարևորությունն ու միջազգային ներկայությունը։

«Դասական Եվրատեսիլի» գլխավոր խորհրդանիշ հանդիսացող թավջութակը նույնպես ներկայացվել է հայկական մշակութային շեշտադրումներով՝ համադրելով Մինաս Ավետիսյանի գունային աշխարհն ու ազգային մոտիվները։

Մրցույթի կարգախոսն է՝ «Հայաստան. Վայր, որտեղ դասական երաժշտությունը միավորում է»։ Այս ուղերձով Հայաստանը ներկայանում է որպես մշակույթի, արվեստի և դասական երաժշտության միավորման հարթակ։

Հետևեք մեզ՝ այստեղ