Ո՞վ է հարցաքննել Նիկոլ Փաշինյանին

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

«Եռաբլուր» զինվորական պանթեոնում զոհված զինծառայողների ծնողներին բռնի ուժով բերման ենթարկելու վարույթով 16 ծնող տուժող էր ճանաչվել։  Զոհված զինծառայողների ծնողները, հիշեցնենք,  սեպտեմբերի 20-ի լույս 21-ի գիշերը հերթապահում էին Եռաբլուրում, որպեսզի տապալեին վարչապետ Նիկոլ Փաշինյանի այցը զինվորական պանթեոն, սակայն սեպտեմբերի 21-ի առավոտյան ոստիկանությունը, ուժ կիրառելով, նրանց հեռացրեց տարածքից, զոհվածների ծնողներին տեղափոխեցին բաժանմունք, ինչից հետո իշխանության ներկայացուցիչները կարողացան ծաղիկներ և ծաղկեպսակներ դնել։ Զոհված զինծառյողների ծնողներն այժմ Քննչական կոմիտեի շենքի դիմաց են, պնդում են՝ արդեն տևական ժամանակ է անցել, բայց վարույթի մասով իրենց գրեթե ոչինչ հայտնի չէ, միայն գիտեն, որ 16 հոգու տուժող են ճանաչել։ Ծնողները ուզում են անձամբ ՔԿ նախագահ Արգիշտի Քյարամյանից տեղեկանալ վարույթն ինչ փուլում է։
«Նախ պետք է մինչև հիմա Քննչական կոմիտեի ղեկավարը Ոստիկանության պետին գոնե հարցրած լիներ, թե ինքը ընդհանրապես ինչ հրաման է տվել և այլն, բայց փաստացի որևէ գործողություն էլ չեն անում, ավելին՝ արհեստական ձգում են։ Հնարավոր է, որ սենց ամիսներով ձգեն, բայց մինչև ե՞րբ։ Հնարավոր է բերման ենթարկված ծնողներից շատերը այս պահին քաղաքում չեն ու մի երկու տարի չեն լինելու, ի՞նչ, պիտի վարույթը երկու տարի ձգվի, հա՞»,- լրագրողների հետ զրույցում ասաց ծնողներից մեկը։

Լրագրողների դիտարկումներին, որ վարչապետ Փաշինյանը լրատվամիջոցներից մեկի տեղեկության համաձայն օրերս պետական դավաճանության գործի շրջանակում  հարցաքննվել է, ծնողը արձագանքեց․

«Ես նույնպես եթերով եմ տեղեկացել, որ նա հարցաքննվել է։ Հարցաքննողն էլ Ռաֆոն է եղել, որը ընդամենը մի քանի ամիս առաջ պետական պարգև է ստացել։ Նա տվյալ գործի քննչական խմբի ղեկավարն է։ Եթե ճիշտը ասեմ, ապա ես չեմ էլ հավատում, որ նա հարցաքննվել է, որովհետև երբ որ մեր փաստաբանը գրություն է արել պարզելու համար, թե հարցաքննվել է, թե ոչ, նրան պատասխանել են, որ դա գաղտնիք է, իրեն ոչինչ ասել չեն կարող։ Այսինքն՝ մեր հարցին չեն պատասխանում, մեկ էլ հանկարծ «Ազատությունով» տեղեկություն է հայտնվում, որ հարցաքննվել է, այդ ինչպես է այդպես ստացվում։ Ես չեմ հավատում, որ նա հարցաննվել է, նորից եմ ասում։ Եթե ինչ-որ խնջույքի ժամանակ հանդիպել են, նա էլ մի երկու հարց է տվել մյուսին, դա դեռ չի նշանակում, որ հարցաքննվել է»։