«Մանկական Եվրատեսիլի» շոուն շատ օրիգինալ է լինելու. Մովսիսյանը` կատարված աշխատանքի մասին

«Մանկական Եվրատեսիլ-2022» երգի մրցույթում Հայաստանը մի շարք փոփոխություններ է մտցրել, որպեսզի այն լինի օրիգինալ։ Այս մասին հրավիրված մամուլի ասուլիսի ժամանակ ասաց Հանրային հեռուստաընկերության գործադիր տնօրեն Հովհաննես Մովսիսյանը։

Մովսիսյանը շեշտեց, որ Երևանում անցկացվելիք «Մանկական Եվրատեսիլին» Հայաստանը սկսել է պատրաստվել հաղթանակից անմիջապես հետո։
««Մանկական Եվրատեսիլի» շուրջ առաջին հանդիպումները սկսվել են այս տարի` գարնանը։ Մրցույթում ներգրավվել են հարյուրավոր մասնագետներ, ոչ միայն եվրոպական հեռարձակողների միության գործընկերները, այլև եվրոպական մի քանի երկրից մասնագետներ։ Մենք փոփոխություններ ենք մտցրել և դրանցից մեկն այն է, որ Երևան ենք հրավիրել նախորդ 19 տարվա հաղթողներին։ Հիմնական շոուի ժամանակ մենք նրանց կտեսնենք բեմում, նրանք հատուկ համարով են հանդես գալու։ «Մանկական Եվրատեսիլի» ժամանակ ելույթ է ունենալու նաև Տավուշի թեմի երգչախումբը»,– ասաց Մովսիսյանը։

Փոփոխություններից մեկն էլ այն է, որ 4 հաղորդավարներից մեկը ռոբոտ է լինելու` Ռոբինը։ Հանրային ՀԸ-ի գործադիր տնօրենը շեշտեց, որ Ռոբինի ներկայությունը ցույց է տալու Հայաստանի տեխնոլոգիական ներուժը։

Մովսիսիյանը նշեց, որ այս պահին մարզահամերգային համալիրում 1000–ից ավելի մասնագետ է աշխատում և վստահեցրեց` այն ինչ կտեսնի հանդիսատեսը դեկտեմբերի 10-ին և 11-ին, կլինի հիշարժան և տպավորիչ։

«Մանկական Եվրատեսիլի» գործադիր տնօրեն Մարտին Օստերդալը նշեց, որ երգի մրցույթում դրական զարգացումներ են եղել վերջին տարիներին։
««Մանկական Եվրատեսիլը» մեզ համար շատ սիրելի բալիկ է, որը շատ արագ մեծանում է։ Մենք շատ բարձր ենք գնահատում մեր հայաստանյան գործընկերների կատարած աշխատանքը։ Բացման արարողությունը, որը կայացավ երկուշաբթի օրը, նոր հանգրվան էր։ Ես ապշած էի, տեսնելով ստեղծագործական, կազմակերպչական որակները»,– ասաց Օստերդալը։
Անդրադառնալով մասնակից երկրների պատվիրակությունների տպավորություններին` Մարտին Օստերդալը վստահեցրեց, որ բոլորը դրական տպավորություններ ունեն և հիացած են ոչ միայն կազմակերպչական մասից, այլև ջերմ ընդունելությունից և հյուրընկալությունից։

Խոսելով «Մանկական Եվրատեսիլի» ապագայի մասին` Օստերդալը շեշտեց, որ որոշ հանգամանքներ պետք է հաշվի առնվեն երգի մրցույթն ավելի մեծացնելու համար։ Նա հույս հայտնեց, որ հետագայում նոր մասնակից երկրներ կլինեն, և սփռումն էլ ավելի կընդլայնվի։»,– ասաց Օստերդալը։
Նշենք, որ «Մանկական Եվրատեսիլ- 2022»–ը կկայանա դեկտեմբերի 10-ին և 11–ին Երևանի մարզահամերգային համալիրում։